Feijoo afirma que o Parlamento valorará converter La Coruña en topónimo oficial

Era un eslógan xenérico para a campaña electoral local, pero pode converterse en algo máis. A proposta do PP coruñés de rescatar o topónimo “La Coruña” acaba de contar co beneplácito do presidente da Xunta, Alberto Núñez Feijoo. Este asegurou que se gaña o candidato do seu partido, o Parlamento valorará estudar a legalización da denominación bilingüe. O presidente asegurou que “hai moitísimos máis coruñeses a favor do topónimo bilingüe A Coruña-La Coruña que galegos de chamarlle Galiza a Galicia”. Cambiar a toponimia implica modificar a Lei de Normalización Lingüística, o que Feijoo vería viable “se o pleno municipal desa cidade (A Coruña) decide por maioría solicitar o cambio da lei, entón corresponderá ao Parlamento tramitar esa iniciativa”.