O alcalde de Lalín, José Crespo e mais Beatriz García, da empresa E-Burbulla, presentaban onte na capital do Deza o proxecto Lalinlab. A iniciativa pretende constituír un centro de referencia no campo da cultura, centrado na creación, a investigación e a formación. Nese sentido, o proxecto quere contar coa participación de preto de sesenta asociacións do concello e dinamizar o sector con vistas a facer da cultura un sector económico. No seu estudo previo para o proxecto, E-Burbulla concluíu que Lalín conta cun importante tecido asociativo neste campo, centrado en grande medida na cultura tradicional.
