Foto da inauguración do monumento en 1936
Foi unha das estatuas máis breves da Historia da arte galega. O 3 de maio de 1936 o profesor Benito Prieto e os seus alumnos do Instituto de Tui inauguraban nos xardíns da Media Lúa da cidade un busto realizado por eles dedicado a Sócrates. Só un par de meses despois, o busto era destruido e guindado polas tropas de Franco ao Miño e o profesor Prieto encadeado. Unha comisión cidadá promoveu, desde 2009, por suscrición popular, a realización dun novo busto para repoñer nos xardíns. Os alumnos do instituto, coa axuda dos profesores e un escultor local, volveron construír un novo busto de Sócrates, similar ao anterior, que se colocará outra volta nos xardíns municipais.
A estatua inaugurarase o 26 de xuño ás oito da tarde, e na inauguración non se pronunciarán discursos. Só haberá un percorrido musical que recollerá o periodo desde a súa inauguración no 36 ata hoxe e os seus principais acontecementos.
