Fuste da Porta Francíxena da Catedral, presente na mostra
O Braccio di Carlo Magno da Praza de San Pedro do Vaticano acolle desde esta mañá a exposición Compostela e Europa. A historia de Diego Xelmírez. A mostra, grande aposta internacional deste Xacobeo, amosa a través da vida do bispo compostelán as relacións continentais da Galicia Medieval. Logo da súa estancia en París, o proxecto ampliouse con novas pezas e unha reconstrución 3D das Torres do Oeste, que se poderán ver ata o vindeiro 1 de agosto. Antes diso os días 4 e 5 deste mes celebraranse na cidade as xornadas La Francigena dell’Arcivescovo Diego Gelmírez: Culti e pellegrinaggi nell’Italia medievale.
