Os oceanógrafos investigan o Banco de Galicia para incoporalo á Rede Natura

A 200 quilómetros ao oeste da costa galega hai unha montaña submarina denominada na cartografía pesqueira coma o Banco de Galicia, pola súa rendibilidade pesqueira. Agora, un grupo de investigadores do Instituto Español de Oceanografía, a través do proxecto Indemares do Ministerio de Medio Ambiente, van estudar en dúas campañas de verán -non se pode traballar noutras épocas polas duras condicións climatolóxicas- esta montaña que os científicos definen coma un "oasis submarino" de cara a súa posible inclusión, xunto con outros dez espazos mariños, na Rede Natura.