Concha Cirujano e Iago Seara serán os codirectores do proxecto de conservación e restauración do Pórtico da Gloria. Así o anunciou hoxe a ministra de Cultura, Ángeles González Sinde, no acto de sinatura do convenio que fai efectiva a implicación da Xunta no proxecto. Deste xeito retómase a fase de documentación do Programa Catedral, promovido pola Fundación Barrié, e que permitirá establecer o Plan de Conservación Preventiva, é dicir, o texto que conterá as liñas de actuación para o Pórtico (que, de implicar intervencións no conxunto, deberá convocar un concurso público por invitación). En todo caso, mentres se realice o proceso de estudo e documentación, que se alongará ata o último trimestre deste ano, a andamiaxe non se retirará senón que só se alixeirará.
