Catedral sonora

En pleno ano Xacobeo, a Catedral de Santiago recupera un dos sons tradicionais: o da carraca. É o substituto das campás nos actos litúrxicos do Triduum Sacrum, ou o que é o mesmo, o único son que se vai escoitar entre o Xoves Santo e a misa de Resurrección (na noite do Sábado Santo). “Hai máis de corenta anos que a Catedral de Santiago non fai sonar a carraca” apuntou o xerente do Consorcio, Xosé Manuel Villanueva, que aludiu á recuperación do patrimonio inmaterial da Catedral. A actuación, financiada polo Consorcio e o Xacobeo, tivo un coste de 54.000 euros e implicou a construción dunha réplica exacta da carraca orixinal que se recuperará para a súa exposición museística.