Alfredo Rodríguez e Olga Cameselle en Des-memoria-2
“Non hai un fío argumental, senón que é un xogo de carácter performativo co que pretendemos reflexionar sobre a identidade”. Olga Cameselle define así Des-memoria-2 o último espectáculo de Disque Danza, en colaboración con La Artística, Teatro Ensalle (onde desenvolveron un traballo en residencia) e La Canalla. O dúo que forma xunto con Alfredo Rodríguez, pretende pór sobre as táboas preguntas que serven para cuestionar a identidade como identificación individual e colectiva. Un xogo no que o público desenvolve un papel importante e que sitúa este espectáculo de danza moi próximo á linguaxe teatral. Des-memoria-2 está de xira por Galicia, despois de que esta fin de semana se achegara ás rúas de Vigo.
