Roberto Varela aposta pola colaboración privada para o Xacobeo 2010

Implicar á cidadanía e, sobre todo ao eido privado. Esta foi a mensaxe que lanzou no Parlamento Roberto Varela, conselleiro de Cultura, para explicar as liñas do Xacobeo. O conselleiro apuntou que ata o momento se recadaron 6 millóns de euros, cifra que se incrementará nos vindeiros meses. Varela apuntou que chegaron preto de 700 propostas que está a estudar a Comisión de Avaliación de Proxectos do Xacobeo. En canto aos criterios, Roberto Varela avogou pola “austeridade e rigor cultural, fronte ás políticas culturais dilapidadoras do erario público e baseadas en criterios subxectivos”. Nese sentido, aclarou que só se primarán aqueles proxectos viables “desde un punto de vista orzamentario, técnico e de producción”. Entre as iniciativas que se desenvolverán no Ano Santo está unha nova edición de “Contos do camiño” para achegar aos nenos o patrimonio cultural das rutas xacobeas con obradoiros artísticos e de animación á lectura. A diferencia, é que nesta ocasión, o programa terá carácter internacional e chegará ao resto do Estado, Portugal e Francia.