Expertos e investigadores debaterán en Compostela sobre a literatura infantil

De hoxe nun ano, Santiago acollerá o 32 Congreso do IBBY, ou o que é o mesmo, o máis importante evento relacionado coa literatura infantil e xuvenil do país. O encontro presentouse hoxe baixo lema A forza das minorías e contará coa presenza de escritores, investigadores, especialistas e editores como Teresa Colomer (Cataluña), Emilia Ferreiro (Arxentina/México), Olayinka Koso-Thomas (Nixeria/Serra Leona)ou a brasileira Lygia Bojunga. O programa, que está bastante perfilado, inclúe seminarios, obradoiros, mesas redondas e actividades como a presentación de revistas, exposicións e actividades sociais e culturais. Para Roberto Varela, conselleiro de Cultura, esta cita suporá unha oportunidade para proxectar no exterior o “vigor e a calidade” dos autores galegos.