Os Ministerios de Fomento e Educación aprobaron unha subvención de máis de 240.000 euros para a restauración do castelo de Moeche, na comarca de Ferrol. Esta axuda supón arredor do 50 por cento do total do custe das obras. O castelo, de finais do século XIV, pertenceu á familia dos Andrade e foi tomado polos labregos durante as revoltas do século XV. Hoxe en día é moi coñecido polo Festival Irmandiño que se celebra no edificio na terceira semana de agosto.
