Castelo de San Felipe. Imaxe de Turismo de Galicia
O castelo de San Felipe, a praza da Catedral de Mondoñedo, o mosteiro de Montederramos e a catedral de Ourense repartirán os 1,24 millóns de euros que achegan este ano diferentes administracións nos fondos do 1,5% Cultural. Os ministerios de Fomento e de Cultura acordaban onte as actuacións que se financiarán este ano en Galicia con cargo a esta partida, á que Fomento achega un total de 932.462 euros. En concreto, o Castelo de San Felipe recibirá a 455.581 euros para mellorar as súas cubertas e o sistema de evacuación de augas. A praza da Catedral de Mondoñedo, pola súa banda, contará con 258.739 euros para melloras, mentres en Montederramo 200.000 euros acondicionarán novos espazos para a visita pública. Finalmente, as reixas e púlpitos da capela maior da Catedral de San Martiño en Ourense contarán con 328.962 euros para novos labores de restauración.