Os veciños localizan dous miliarios romanos na obra do AVE en Pontevedra

Foi Soledad Vilela, veciña do lugar de O Pazo (Salcedo, Pontevedra) a primeira que localizou no fondo dunha zanxa un gran bloque cilíndrico que os obreiros que traballan na vía de construción do AVE botaran contra un lado pensando que era formigón. Soledad comunicoullo ao presidente da Asociación de Veciños Heroes do Campo da Porta, Xosé Ramón Lage quen, ao limpar a superficie da pedra, localizou unha inscrición en latín nun deles. O arqueólogo municipal identificou o gravado no que se indica que o miliario foi dedicado aos emperadores Máximo e Maximinus, no século III d.C. O outro miliario aínda está no fondo da zanxa, sen poder ter sido estudado. A alcaldesa en funcións de Pontevedra, Teresa Casal, solicitou á Consellería de Cultura a suspensión cautelar das obras ata que se realice unha investigación en profundidade na zona para determinar se hai máis restos arqueolóxicos.