Nova Escola Galega súmase ás reflexións sobre galego no ensino

Co título de Nova Escola Galega opina: A cuestión lingüística, este colectivo de renovación pedagóxica acaba de publicar un texto no que reflexiona polo miúdo encol das medidas que a Xunta anunciou sobre o galego no ensino. Entre outras cuestións, no texto denúnciase a imposibilidade de optar por un ensino totalmente en galego na enquisa que se lle está a distribuír aos pais de alumnos, ou que o goberno galego "pretende aplicar os criterios das leis do mercado tamén á cultura e á lingua". Pola súa banda, o Departamento de Filoloxía Galega da Universidade de Santiago envioulle unha carta ao presidente da Xunta na que denuncia que o goberno "incorre nunha grave responsabilidade ao trasladarlles aos pais e nais decisións que lles corresponden aos poderes públicos, colocando a lingua galega como motivo de división social e creando un conflito que non existía ata o de agora". O texto, aprobado por unanimidade, reclama medidas que garantan a presenza da nosa lingua no ensino. Segundo adianta Vieiros, departamentos homólogos das outras universidades do país preparan cadanseu texto nesta mesma liña.