A seguir a tendencia que nos últimos anos está a tirar do esquecemento todo tipo de figuras tradicionais do Entroido, a localidade de Boado, en Xinzo, está a traballar para recuperar o Manturreriro. Este personaxe, que deixou de sair nos entroidos locais hai xa seis décadas, ía vestido con farrapos que cubrían totalmente o rostro e que se impregaban con excrementos ou lodo. A Asociación Traslaxás está a documentar imaxes e testemuños desta figura para conseguir que volte saír á rúa na vindeira celebración desta festa.
