A Real Academia Galega insta ao goberno a afastar o galego da controversia partidaria

Nun acto inédito e ante “os pronunciamentos e comunicacións públicas que dun tempo a esta parte se están a producir arredor da lingua galega”, a Real Academia Galega acaba de emitir un comunicado no que insta ao goberno a traballar “na procura dun acordo social integrador, a prol do uso, a dignidade e a continuidade do idioma”. No documento, a RAG considera que ese acordo se debe sustentar en catro piares: arredar a lingua galega da controversia partidaria; o impulso do multilingüísmo; a reafirmación e desenvolvemento do Plan Xeral de Normalización da Lingua Galega; e o compromiso de impulsar unha cooficialidade simétrica na que todos os cidadáns teñan “dereitos e deberes co castelán e co galego”.