Foi en decembro de 2008 cando Emilio Pérez Touriño anunciou, á saída dun Consello da Xunta, que nun prazo de semanas se constituiría a Fundación Gaiás. De carácter semipúblico, contaría cun capital de 25 millóns (12,5 achegados desde o erario público e outros tantos desde o lado privado) e estaría presidida por Juan Manuel Urgoiti. Pois ben, Xornal de Galicia denuncia hoxe que a entidade segue sen xerente e nin tan sequera chegou a inscribirse no rexistro mercantil. A fundación naceu para xestionar as actividades da Cidade da Cultura que teñen carácter comercial (o Centro Internacional de Arte, o Museo de Nenos e Nenas e o Espazo Obradoiro). Agora ben, a entidade insírese agora nun novo contexto, logo do cambio electoral. O presidente Núñez Feijoo solicitou unhas semanas para coñecer a situación exacta do complexo e comezar a tomar decisións.
