A Xunta ultima o proceso administrativo para crear a nova fundación da Cidade da Cultura

"Nos próximos días ou semanas" procederase a constituír a nova fundación para a Cidade da Cultura. Así o expresou Emilio Pérez Touriño, presidente da Xunta de Galicia, despois de informar que o Consello da Xunta culminou o proceso administrativo para crear esta fundación mixta público-privada. Isto tradúcese nunha transferencia de crédito de 12.5 millóns de euros para constituir unha entidade que nacerá con máis de 25 millóns. Esta fundación, a terceira creada arredor do complexo do monte Gaiás, encargarase de xestionar as actividades que teñen carácter comercial: o Centro Internacional de Arte, o Museo de Nenos e Nenas e o Espazo Obradoiro. Juan Manuel Urgoiti será o encargado de presidir esta entidade que terá unha participación privada do 51%.