Unha das teimas de Eugenio Granell era que, á súa morte, os seus fondos non estiveran dispersos. Ata tal punto, que o deixou escrito no seu testamento. A Fundación que leva o seu nome albergaba na súa sede de Santiago a colección pictórica (máis de dúas mil obras entre obras do artista, doutros surrealistas e unha colección de arte étnica) pero non dispuña de espazo físico para a súa biblioteca (conformada por uns 11.000 volumes). Por iso, o Consorcio de Santiago acaba de anunciar (con dous anos de atraso) unha reforma do Pazo de Bendaña que permitirá acoller e exhibir a biblioteca. A adaptación, que ten un custe de 629.896 euros, incrementará a sede da fundación en 400 metros. Un espazo que ocupa a oficina municipal de Emuvissa que se traslada ao Sar.
