Compostela acollerá a semana que ven o congreso Brasil:500 anos depois, no que se analizará a historia de Brasil desde o seu descubrimento, do que se está a conmemorar o quinto centenario. Desde unha perspectiva crítica e tocando temas tan dispares como o medio, a economía a cultura ou a política. Será entre o 6 e o 10 deste mes nas facultades de Xeografía e Mediciña.
Multiculturalidade
Galegos, portugueses e brasileiros serán os encargados de facer un repaso sobre os 500 anos da historia de Brasil. Entre as cuestións a tratar están o entroido desde o punto de vista empresarial, a organización política e sindical, a presencia dos galegos no país, o cinema, a literatura ou a situación económica brasileira. Ademais dos expertos de cada un dos países, representantes do movemento dos Sem Terra ou Meninos da Rua foron convidados a participar.
Importancia
Máis de vinte institucións, entre as que destacan a Cátedra Unesco de Estudios Luso-Brasileiros, o Instituto Camões e a Universidade de Santiago de Compostela colaboraron na organización do encontro. Segundo a profesora brasileira Yara Frateschi, docente na Universidade de Santiago, non se celebrou durante este ano un foro que contemplase tan integramente a historia e a situación de Brasil coma este.
