Ata un oitenta por cento das organizacións non gubernamentais galegas contemplan o respecto á diversidade lingüística nos seus estatutos, e un 75% considera importante que o galego sexa a súa lingua oficial. Estes son algúns dos datos que se recollen o estudo que realizou o Instituto Galego de Análise e Documentación Internacional (IGADI) e que presentaron esta mañá as secretarías xerais de Política Lingüística e de Relacións Exteriores. No entanto, o mesmo estudo recolle que o emprego efectivo da nosa lingua nestas organizacións asentadas no país queda nun 50%. Detéctase tamén unha grande diferenza entre aquelas que teñen a súa sede central en Galicia, das que o 72% se comunican en galego, e aquelas que son delegacións de entidades foráneas, que só o empregan nun 28%.
