En xuño de 2007 a Fundación Biblioteca Virtual Miguel de Cervantes asinou un convenio co Centro Ramón Piñeiro para incorporar aos seus fondos os traballos realizados e publicados nesta institución. O resultado dese acordo sae á luz hoxe e chámase Biblioteca das Letras Galegas. Baixo a dirección de Anxo Tarrío, a biblioteca conta con preto de cen recursos entre imaxes, vídeos, audios e textos dixitalizados. Edicións facsímiles de textos medievais, o Refraneiro galego e outros materiais de tradición oral, compilado por Francisco Vázquez Saco en 1952 ou a guía de recursos electrónicos Libros galegos en Internet de Henrique Neira Pereira son algúns dos títulos que se poden consultar neste portal.
