Naceu en 2001 froito da colaboración entre a Deputación da Coruña e as Universidades da Coruña e de Santiago. O proxecto Interea, concibido coma unha iniciativa de investigación aplicada, foi desde aquela un importante foro de reflexión e de formación encol do traballo sociocultural para técnicos locais, asociacións e outros axentes. Agora, segundo anunciaron José Antonio Caride e Héctor Manuel Pose, coordinadores do proxecto, este chega ao seu fin logo de que a Deputación decidise non continuar a iniciativa. Segundo lembran Caride e Pose, Interea obtivo amplos recoñecementos a nivel estatal e internacional polo seu formato anovador e a calidade dos seus contidos.
