Unha mostra recupera o traballo de Seoane e Díaz Pardo á fronte de Sargadelos

Representaron a conxunción da arte e da industria coa nosa identidade cultural. O Laboratorio de Formas foi unha iniciativa promovida por Luís Seoane e Isaac Díaz Pardo para recuperar a literatura, a arte e o deseño desenvolvidos en Galicia antes da Guerra Civil. Cando se cumpren corenta anos da súa creación, a Fundación Luís Seoane e a Sociedade Estatal de Conmemoracións Culturais (SECC), organizan na Coruña unha mostra que achega unha visión do traballo desta entidade. En Sargadelos Recuperado: O laboratorio de formas 40 anos despois poderase ver obra plástica e documental canda a fotografías que achegarán a historia do grupo Sargadelos desde a creación do Laboratorio ata Edicións do Castro, pasando polo Seminario de Estudos Galegos ou a colaboración con outras entidades como Ruedo Ibérico.