Chus Martínez: “É unha aproximación da escena artística contemporánea en Galicia”

Durante tres anos, e no marco do contexto do Proxecto Edición, Chus Martínez Domínguez estivo a compilar información duns cen artistas e creadores que traballan no contexto galego. Un material que se plasmou nun sitio web debidamente catalogado e accesible ao público (Espazodocumental.net). Toda esa documentación, que se garda fisicamente no Centro Galego de Arte Contemporánea (CGAC), foi peneirada, sistematizada e presentada ao público nun novo soporte, o libro, que toma o seu nome do sitio web. A publicación editada por Chus Martínez Domínguez, presentada onte na Facultade de Belas Artes, é unha ferramenta de traballo que inclúe textos e entrevistas sobre o contexto, a produción e a creación artística contemporánea.