“O primeiro de todo é facer unha diagnose tanto do continente como do contido, e a partir de aí facer o plan museolóxico que está pedindo a berros”. Deste xeito anunciaba Aurelia Balseiro, a nova directora do Museo Provincial de Lugo, as súas primeiras actuacións para o centro. É a primeira persoa que ocupa este posto logo de que o pasado mes de febreiro o pleno da Deputación aprobara a súa creación. O Museo abre hoxe unha nova etapa que coincide co momento no que o centro está pendente de ampliar o seu espazo expositivo. Balseiro é licenciada en Xeografía e Historia e leva vencellada á área de cultura da Deputación lucense desde hai máis dunha década.
