A ciencia que fai cultura

O Centro Social Caixanova de Vigo acolle, no seo dos actos paralelos da exposición Galicia 25. Unha cultura para un novo século, unha mesa redonda que reflexionará sobre a A cultura científica en Galicia nos últimos 25 anos. Con Francisco Díaz-Fierros coma moderador, Xosé Antón Fraga, Daniel Soutullo e Uxío Labarta reflexionarán desde diferentes ámbitos sobre como mudou a percepción da ciencia na sociedade durante o último cuarto de século.

Segundo explica Díaz-Fierros, vicepresidente do Consello da Cultura e coordinador da sección de Ciencia Natureza e Sociedade neste organismo “o obxectivo da mesa é expor sobre todo como evoluíu a cultura científica neste tempo. Nese sentido o primeiro é aclarar a idea de cultura científica que, se adoita identificar co I+D”, adianta. “Realmente a Cultura Científica son os coñecementos que podemos chamar populares sobre a ciencia. Canda a isto, tamén entra no concepto a interpretación cultural da ciencia a través das ciencias humanas. Cuestións coma a historia da ciencia, a súa importancia económica, ou o xeito en que a ciencia constrúe valores na sociedade son tamén parte da cultura científica”, recoñece. Encol da integración entre estes dous elementos, Díaz-Fierros apunta que non sempre son equilibradas. “Cando a ciencia se presenta coma cultura científica é unha forma máis de cultura, aínda que hoxe en día está relegada nas seccións culturais nos medios. A día de hoxe é unha forma importante das manifestacións culturais e á hora de crear valores nos imaxinarios colectivos, posiblemente máis que algunhas formas tradicionais de cultura”.

Xosé Antón Fraga: “Hai que dotar a actividade científica de elementos que a acheguen á sociedade”
Segundo explica o moderador, “Xosé Antón Fraga é un dos maiores expertos que temos en historia da ciencia en Galicia, e no último ano encargóuselle a coordinación dos Museos Científicos da Coruña. Os museos son un xeito moi importante de crear cultura científica entre a poboación, e nesta cidade fixeron unha aposta moi importante a nivel estatal. Fraga falará sobre a experiencia que xurdiu destes 25 anos”.



Daniel Soutullo: “A situación da ciencia no ensino é un tanto paradoxal. Téntase trasladar ao ensino os avances científicos pero as materias tradicionalmente científicas en si diminúen a súa presenza”

A falar sobre a pegada da ciencia na mocidade, Díaz-Fierros apunta que “Daniel Soutullo é un profesor de Ensino Medio moi preocupado pola divulgación da ciencia e ver en que xeito pode chegar ao nivel de idade de Bacharelato. Entón contamos con que explique qué se fixo en Galicia no tema da divulgación científica a este nivel e que se pode facer mellor”.



Uxío Labarta: “Houbo mobilizacións ambientais que demostraron a necesidade de que a ciencia estivese presente na xestión do país”

Outro aspecto destacado da cultura científica é a cuestión ambiental. A este respecto participará na mesa Uxío Labarta. “Labarta é un investigador cunha longa experiencia no Instituto de Investigacións Mariñas de Vigo. Está moi metido nos movementos ambientalistas e pode achegar unha visión moi persoal da evolución da conciencia ambiental en Galicia. Hai 25 anos practicamente non existía e agora hai un movemento con asociacións e unha presenza mediática significativa que se debe ter en conta”, lembra o moderador. Este investigador destaca experiencias coma ConCiencia, Climántica e Voz Natura como exemplos destacados de difusión de cultura científica na actualidade.