A primeira xornada do IV Congreso de Bibliotecas que se celebra na Coruña serviu para que o ministro de Cultura, César Antonio Molina incidise na importancia destes centros "para rachar desigualdades sociais" ou que Ánxela Bugallo incidise en que deben ser "centros culturais integrais". No entanto, tamén houbo tempo para reclamacións. Deste xeito, María Antonia Carrado, subdirectora xeral de Coordinación Bibliotecaria no Ministerio, denunciou o escaso apoio que prestan as deputacións ás bibliotecas locais en todo o Estado. Pola súa banda, o alcalde da Coruña, Javier Losada, lembrou a importancia da Rede de Bibliotecas desta cidade e anunciou a vindeira posta en marcha dun novo centro no barrio dos Rosales e doutro integrado no Centro Cultural Ágora, en Agra do Orzán. Segundo Losada, este último proxecto conta cun investimento de 8,1 millóns de euros.
