O novo congreso da AIEG analizará Galicia no contexto global

Será en Santiago no ano 2009 cando a Asociación Internacional de Estudos Galegos, que reúne a moitos dos investigadores do galego que investigan ou imparten docencia en universidades estranxeiras, celebre o seu congreso baixo o título “Galicia nos contextos globais. Perspectivas para o século XXI”. A AIEG anunciou o seu novo congreso no curso da presentación das Actas -libro e DVD- do VII Congreso, que tivo lugar en Barcelona en maio de 2003 e que abordou os temas “Mulleres en Galicia” e “Galicia e os outros pobos da Península”. Na presentación, celebrada no Consello da Cultura Galega, interviron Henrique Monteagudo, secretario da institución; Helena González, coeditora das Actas, e Burghard Baltrusch, Presidente da AIEG.