O Consello da Cultura acollía esta mañá a presentación do X Congreso Internacional de Estudos Galegos, que se celebrará en Cardiff entre o 12 e o 14 de setembro. A nova edición deste encontro trienal, que organiza a Asociación Internacional de Estudos Galegos (AIEG) coa colaboración da Universidade de Cardiff e do propio Consello da Cultura reunirá máis dun cento de relatorios sobre diferentes aspectos da nosa cultura baixo o lema Galiza alén do Arco Atlántico: unha visión multidisciplinar dos Estudos Galegos.
Segundo sinalou Craig Patterson, presidente da AIEG, contarase coa presenza de 125 participantes de orixes tan variadas coma Rusia, Arxentina, Estados Unidos ou Escocia, e especializados en disciplinas coma a Xeografía, a Arte, o Cinema, os Estudos Feministas ou a Filoloxía. No encontro celebraranse sete conferencias plenarias a cargo de David MacKenzie, Xurxo Mariño, Manuel Gago, Rosario Álvarez, Chus Pato, Luz Costa e Helena González.
No seo do congreso intégrase tamén a celebración o Obradoiro de Estudos Rosalianos os días 13 e 14 de setembro, e unha sesión de feche na que se analizarán os trinta anos de historia da asociación.
