Grial 177
Un espazo monográfico coordinado polo finado sociólogo Xan Bouzada e reflexións sobre bioética na última entrega da revista de cultura da Editorial Galaxia
“A escola configúrase como a gran ferramenta social dos tempos modernos”, asegura Víctor Freixanes, director da editorial Galaxia, no último número, a 177, da revista Grial, “o que propoñemos neste número de Grial é unha reflexión sobre o sistema, as estratexias e mesmo nalgún caso as políticas educativas”. A educación é, pois, o tema central da revista, cun conxunto de artigos que estiveron coordinados por Xan Bouzada, o sociólogo da cultura finado recentemente, e que conta con artigos de Mariano Fernández Enguita, Jurjo Torres, Jordi Adell, Rafael Feito ou José Antonio Caride e Héctor Pose.
A maiores, a Grial deste trimestre contén unha conversa con Manuel Vilariño, realizada polo fotógrafo Vítor Vaqueiro e, no apartado de Ciencia, unha reflexión sobre “O ADN e a vida artificial” levada a cabo por Daniel Soutullo, especialista en Bioética e algunha curiosidade histórica, como un artigo realizado polo catedrático Francisco Díaz-Fierros sobre a presenza do frade dominico galego Tomé de Lemos no proceso da Inquisición contra Galileo Galilei.
