Este ano cúmplense dous anos da morte do pintor silledense Manuel Colmeiro. Desde entón, a cantidade de cadros que se atoparon no seu estudio aínda non ten un destino público. Aínda que o pintor declarara en diferentes ocasións que lle gustaría que a súa obra estivera en Vigo, cando a cidade tivera un museo de arte contemporáneo, de momento non se iniciaron ningún dos trámites.
Últimas vontades
O coñecido pintor pontevedrés Manuel Colmeiro deixou trala súa morte unha grande cantidade dos seus cadros no estudio que tiña en Silleda. Un legado artístico que pasou a mans dos seus herdeiros. Dous anos despois ningunha institución se interesou polos dereitos da súa obra. O autor manifestara en abondosas ocasión que lle gustaría que a súa obra estivera en Vigo, cando teña un museo de Arte Contemporánea. Agora, que este museo está a piques de ser unha realidade, os dereitos da obra de Colmeiro están aínda sen xestionar.
Precursor da Escola Española de París
Arturo Souto, Laxeiro e Manuel Colmeiro son os tres creadores dunha estética do granito en Galicia. Uns pioneiros na arte da pedra que logo desenvolveron as súas facetas por camiños diferentes.
Durante a súa estadía en París, Colmeiro descubriuse como un artista políglota da pintura. Unha situación que o converteu nun precursor da Escola Española de París. Polo que o seu legado artístico convértese nunha importante obra de referencia.
Laxeiro, e o seu legado
O caso dos dereitos artísticos da obra de Laxeiro, seguíu un camiño diferente. En parte, porque o propio autor xa cedera en vida parte da súa obra á cidade de Vigo e, en parte, porque existe unha fundación que leva o seu nome, que xestiona parte da súa obra. Agora ben, a colección de lenzos, debuxos e acuarelas que o artista lalinense cedeu á cidade olívica teñen como condición que estén sempre expostos ó público. Unha vontade que se mantén logo de varios anos, nunca faltos de problemas.
