O falecemento do pintor Benito Prieto e as exposicións de Ana Reinaldo e de Laura Bergantiños son os últimos acontecementos destacados da pintura en Galicia.
Falece Benito Prieto
O pintor galego afincado en Granada, Benito Prieto Coussent, faleceu onte ós 98 anos de idad eno seu domicilio de xeito repentino. Prieto chegara a ser membro da Real Academia de Belas Artes de Granada e destacara na realización de murais de carácter social. Unha das súas últimas obras foi "O peregrino da paz". O enterro celebrarase hoxe no cemiterio granadino de San José
Exposición de Ana Reinaldo
O ateneo de Ourense acolle desde hoxe a mostra ConTraTres da pintora Ana Reinaldo. A exposición forma parte do ciclo "Os nosos artistas" que organiza a Consellería de Cultura e que pasará por varias cidades galegas ata abril. A mostra recolle obras que van da figuración á abstracción e tratan temas coma a tauromaquia, o deporte, as relacións de parella ou as viaxes. A pintora xoga constantemente coas cores, contrastando vermellos e azuis dentro dun estilo que non foxe do tradicional. A mostra poderá visitarse ata o vindeiro día 26 de febreiro.
Mostra de Laura Bergantiños
Desde o pasado venres e ata final de mes, pódense ver no Casino do Atlántico de A Coruña as bolboretas que conforman a mostra da pintora Laura Bergantiños. Na súa carreira, que arrincou en 1987, Laura estivo sempre moi interesada na natureza, cunha grande atención á luz e ás cores. Este interese reflíctese agora nunha mostra que as ás das bolboretas son o eixo principal
