CORREO
RSS
O Cultura Quente colle forzas na súa nova xeira
abril 26, 2016
O pasado verán resucitaba logo de tres anos en silencio, e agora amosa a súa intención de volver a ser un referente no circuíto de festivais. A organización do Cultura Quente de Caldas daba a coñecer estes días o cartel do evento para este 2016. Un programa de dous días (un máis do que en 2015) no que visitarán a carballeira da vila Los Enemigos, Supersuckers, Marky Ramone, Ilegales, El Drogas, Siniestro Total, The Soul Jacket, Havalina e Agoraphobia. Como novidade, a recadación das cotas por acampar irá integramente destinada aos refuxiados sirios.
En paralelo, o Festival Derrame Rock acaba de anunciar o cartel da súa vindeira xeira que se celebrará en Xixón. Desacordos entre a organización e o actual goberno local de Ourense levaron a que este veterano evento abandone o noso país logo de cinco edicións a se desenvolver na Cidade das Burgas.