A obra de Miguelanxo Prado será un dos temas do día sobre os que terán que responder os concursantes do programa 115 de "Cifras e letras". Neste concurso que emite a TVG, os presentadores achegarán datos sobre o traballo do noso autor máis internacional, a tratar temas coma a súa formación de arquitecto, a participación do autor en Viñetas desde o Atlántico ou o seu último proxecto, o filme "De profundis". Precisamente Prado adianta que este seu proxecto contará cunha edición en formato libro ilustrado. "Será unha versión baseada nos cadros, nos deseños de produción e nas imaxes que estou a crear para historia", explica o autor. "será coma unha versión escrita, en clave máis poética, da mesma historia muda do filme, con moitísimas imaxes e referencias que no filme non teñen por que ser evidentes". O libro incorporará un DVD co filme sen os contidos adicionais que se poderán ver na edición en caixa.
Máis información no web da CRTVG sobre o programa e nos nosos arquivos sobre Miguelanxo Prado
