"Barsowia" faise co Premio do Público ao mellor fanzine editado en 2005 no Saló de Barcelona

Aínda que non houbo pleno para os galegos, tampouco se pode dicir que a nosa banda deseñada voltase de baleiro da última edición do Saló del Còmic de Barcelona. A publicación "Barsowia", editada polo colectivo Polaqia, facíase na noite do venres co Premio do Público ao mellor fanzine editado durante 2005. Canda a esta nova, chéganos desde Barcelona o anuncio da editorial Dibbuks de que no vindeiro outono sairá á luz o álbum "Lucky Duckie", con deseños de Víctor Rivas sobre guión de Miguel Porto. E aínda coñecemos a participación de David Rubín en "Nuestra Guerra Civil", un álbum colectivo que publicou con ocasión deste evento Ariadna Editorial. Pola súa banda, Alberto Vázquez está presente cunha historia no último número da prestixiosa revista "Nosotros somos los muertos". Agardamos aínda que nos vindeiros meses vaian xurdindo máis novas a raíz dos contactos que os autores galegos desenvolveron no Saló.

Máis información no noso tema sobre o Saló; ficha de Barsowia e en La Voz de Galicia; recensión do último NSLM en Fandecomix.com; a lista completa dos premiados no web de FICOMIC