Van xa nove edicións da Feira de Teatro en Santiago. Sen embargo, esta vez existen novidades con respecto a outros anos; xa que por primeira vez está integrada na Coordinadora de Feiras de Teatro do Estado Español. Do 6 ó 10 de marzo, 25 compañías, máis de 130 promotores de espectáculos e técnicos culturais de España e Portugal exhibirán o seu facer teatral en sete escenarios compostelanos.
Selección
A traxectoria profesional, a novidade na exhibicións dos espectáculos, a cualidade e o interese artístico e o número de actuacións das candidatas foron algúns dos requisitos polos que foron seleccionadas 21 das 33 compañías galegas que se presentaron. Así, 21 compañías galegas e 4 de fóra da comunidade son as compañías que participarán na novena edición da Feira do Teatro de Galicia.
Cinco días
Durante cinco días, do 6 ó 10 de marzo, o Salón Teatro, o Teatro Galán, o Teatro Principal, a Sala Nasa, a Sala Sanyago, a Aula de Cultura de Caixa Galicia e a praza da Quintana acollerán as múltiples interpretacións programadas dentro da Feira de Teatro.
As novidades na organización
Por primeira vez a Feira do Teatro de Galicia, iniciativa da Consellería de Cultura, Comunicación Social e Turismo, incorpórase na Coordinadora de Feiras de Teatro do Estado Español. Unha entidade que agrupa a trece comunidades e que conta coa participación de 365 formacións teatrais. Tódalas representacións están abertas a todo o público, e para fomentar a asistencia fixáronse prezos populares. De tódolos xeitos un dos obxectivos prioritarios é o de conseguir atraer a presencia de programadores culturais que contraten as compañías galegas fóra dos circuitos habituais.
