A trixésimo terceira feira do libro coruñesa reúne aos escritores nun denso programa de presentacións

A Feira do Libro da Coruña que está a celebrarse nos Xardíns Méndez Núñez da cidade fai trinta e tres anos nesta edición. Máis de medio centenar de postos expoñen noventa mil exemplares ao público até o martes día 10. As editoriais Xerais e Galaxia, farán pasar pola feira a Jaureguizar, Suso de Toro, Ramiro Fonte, Miguel Anxo Fernán Vello ou Xosé María Álvarez Cáccamo, entre outros. Para o martes 3 ás 20:30 horas, está prevista a presentación de “Historia da Costa Galega e os seus naufraxios” de Fernando Patricio. O mércores 4 Manuel Rivas asinará ás 18 horas exemplares do seu novo libro “Unha espía no reino de Galicia” e do resto das súas obras para despois facer unha presentación pública desta nova publicación, ás 19 serán Xosé Antonio Neira Cruz, Pablo Martínez Orballo e Concha Blanco os que participarán nun obradoiro para os máis cativos. O xoves 5 ás 19 horas Carlos G. Reigosa asinará exemplares das súas obras e ás 20:30 horas terá lugar unha mesa redonda co tema “Ideas arredor de Galicia”, na que participan Víctor F. Freixanes, Ramón Villares e Xosé Luís Barreiro Rivas. O venres 6 será o escritor Xesús Fraga quen asine exemplares das súas obras e Bieito Iglesias presentará o seu libro “Amor e música lixeira”. A escritora Marina Mayoral asinará exemplares da súa última publicación “Ao pé do magnolio” o sábado 7 ás 20 horas.