Foto oficial da presentación con representantes de Concellos, artistas, empresas patrocinadoras e equipo do festival
A novena edición do ciclo Metropolitano pola Igualdade na Música e nas Artes 'Elas son artistas' terá o vindeiro 9 de abril a súa Festa de presentación na Sala Mardi Gras, onde comezou todo. A artista venezolana Georgina será a encargada de que a música comece a soar. Aínda que este ciclo acolle múltiples disciplinas artísticas. Este ano haberá pintura, poesía, teatro, circo, cómic e diversas actuacións musicais. Serán máis de vinte as actuacións que poda gozar o público, moitas delas gratuítas.
A seguinte actuación será o día 24 de abril en Oleiros, no Auditorio da Fábrica. A madrileña La Otra ofrecerá un directo cun custe de catro euros a entrada, tras regresar da súa xira por Latinoamérica onte participou en varios festivais. O ciclo prolongarase ata o domingo 29 de novembro, día no que o espectáculo Fieralinda de Ede será o punto final desta novena edición. Xa coa ollada na décima. Silvia Penide, a nova directora, agradeceu o traballo realizado por Yolanda Villa a quen releva este ano ao fronte do proxecto. O ciclo presentará actividades nos concellos da área metropolitana da Coruña: Arteixo, Culleredo, Oleiros, Sada, Carral e Betanzos. A empresa construtora Citanias será a patrocinadora principal, xunto a Gadis, Coca-Cola, a Xunta de Galicia, a Asociación de Intérpretes e executantes e a República Musical Mardi Gras no capítulo de colaboradoras.
Na Coruña están previstos, como mínimo, 10 eventos con 13 mulleres artistas como protagonistas. Serán nas salas de concertos: Garufa Club, Jazz Filloa e Mardi Gras, ademais de na Praza de Azcárraga, na Casa Museo María Pita, na Casa Museo Casares Quiroga, no Auditorio da Domus e no Teatro Colón. Sen descartar algún espazo máis que aínda non está confirmado.
