Teresa Rocamonde. Fonte: RAGC
A reportaxe Os fármacos do centeo, emitida na TVG o 30 de abril de 2025, valeulle á xornalista Teresa Rocamonde facerse co Premio de Xornalismo Científico Celia Brañas. A Real Academia Galega de Ciencias convoca este galardón, que recoñece con 3.500 euros en metálico pezas de temática científica ou tecnolóxica, de carácter informativo, en formato escrito ou audiovisual.
O traballo de Rocamonde fala sobre os primeiros fármacos elaborados no noso país co caruncho do centeo e, segundo o xurado, "conecta co papel da muller no agro, dedicada neste caso ao cultivo do centeo, que converteu a Galicia no seu momento nun referente na produción do caruncho con fins médicos". Ademais, sinala o fallo, "recolle todo o proceso da I+D+i na elaboración dos preparados farmacéuticos, dende o laboratorio ao mercado". A peza emitiuse no marco da serie Historias a pé de páxina.
Canda a ela, o galardón recoñeceu cun accésit de 1.500 euros á xornalista Cinthya Martínez e ao cámara Alejandro López-Benito. A reportaxe Así es el «Google Maps» de los cirujanos publicouse en La Voz de la Salud de La Voz de Galicia o 16 de novembro de 2025. A peza, que aborda o traballo do equipo de impresión 3D do Instituto de Investigación Biomédica da Coruña (INIBIC) "recolle", segundo o xurado, "un caso de transferencia de tecnoloxía do laboratorio á clínica que repercute directamente na vida das persoas”. Os premios entregarase o vindeiro 15 de abril no Pazo de San Roque de Santiago.
