Cartaz do Día das Artes 2026
A Real Academia Galega de Belas Artes (RAGBA) presentou os actos do Día das Artes Galegas 2026, que este ano homenaxea a figura do fotógrafo e cineasta José Suárez (Allariz, 1902 – A Garda, 1974). O mércores, 1 de abril, celebrarase o acto central do Día das Artes Galegas na Casa da Cultura do Concello de Allariz, nun evento aberto ao público que comezará ás 19:00 horas. O presidente da RAGBA, Manuel Quintana Martelo, inaugurará o acto institucional cun discurso de benvida e Xurxo Lobato será o académico responsable de pronunciar a laudatio na que enxalzará con precisión e emotividade a traxectoria de Suárez. O evento contará coa asistencia de representantes da Xunta de Galicia, Concello de Allariz, e doutros organismos e entidades culturais. Este Día das Artes Galegas 2026 será a primeira vez que se homenaxee a un persoeiro da provincia de Ourense e, tamén, será a primeira ocasión que se recoñeza a traxectoria dunha figura relacionada coas artes da imaxe.
Ao longo do Ano José Suárez organizaranse desde a RAGBA, en colaboración con diversas entidades, máis de 30 actividades. Previamente ao acto do 1 de abril, a primeira acción será o vindeiro 24 de marzo na sede da RAGBA na Coruña, cunha conferencia no marco do ciclo "Os Martes das Artes", onde o historiador Manuel Sendón analizará a traxectoria de José Suárez. O mesmo 1 de abril o Concello de Allariz inaugurará una exposición de lonas murais polas rúas da vila coa obra de Suárez; e a Federación de Asociacións Culturais Galegas, "Galiza Cultura", divulgará a obra de Suárez en Nós Diario. Tamén haberá unha exposición no Centro Cultural Marcos Valcárcel, organizada en colaboración coa Deputación de Ourense, que se inaugurará a mediados de abril. A mostra estará comisariada polo académico e historiador da arte Carlos L. Bernárdez, e terá como asesores a Xosé Luis Suárez Canal –sobriño de José Suárez– e Manuel Sendón. Tamén a Xunta de Galicia reeditará o libro sobre José Suárez que xurdiu a raíz da exposición de 2015 na Cidade da Cultura "José Suárez: Uns ollos vivos que pensan". En colaboración coa Consellería de Educación distribuiranse 3.000 carteis fotobiográficos de José Suárez nos centros de ensino.
A Academia, o Colexio de Xornalistas de Galicia e a Facultade de Ciencias da Comunicación da Universidade de Santiago (USC) celebrarán o 13 de abril un acto no centro universitario para divulgar a figura de Suárez no que participarán Xosé Luis Suárez Canal, profesor asociado de Fotografía na facultade; Xurxo Lobato; e un representante do colexio profesional. O 14 de abril, a sede da RAGBA acollerá a presentación do libro "Tras da mirada de José Suárez" de Olaia Sendón, editado por Galaxia. Tamén coa participación da Academia, o 27 de abril celebrarse un acto no Ateneo de Santiago, e o 28 de abril unha xornada no Consello da Cultura Galega. Xa no mes de maio proseguirán as actividades coa inauguración o 4 de maio da exposición "José Suárez, vida e obra" na Deputación de Lugo, composta por 16 paneis autoportantes que logo se amosaran en outras localidades da provincia. O 7 de maio terá lugar unha tertulia con achegados a Suárez no Centro Marcos Valcárcel de Ourense.
, anos 50.jpg)
Para o segundo semestre do ano, as actividades comezarán a finais de setembro coa xornada "José Suárez e a arte do seu tempo" no Centro Galego de Arte Contemporánea (CGAC). O Campus de Ourense da Universidade de Vigo (UVigo) acollerá unha nova exposición coa colaboración da RAGBA. Tamén o Concello de Allariz inaugurará o Museo José Suárez. A Academia presentará un documental sobre José Suárez, dirixido por Xurxo Lobato. Ademais, nestes últimos meses organizarase un ciclo de cinema na Filmoteca de Galicia, coordinado polo académico, historiador de cine e catedrático de Comunicación Audiovisual na USC, José Luis Castro de Paz, e posiblemente tamén na Filmoteca de Madrid, para proxectar diferentes películas de Suárez. A Academia tamén colaborará nunha acción co Centro Nacional de Fotografía.
Ademais, a Academia de Belas Artes colaborará co Museo do Pobo Galego e o Museo de Pontevedra, e as Fundacións Carlos Casares, Blanco Amor e Vicente Risco na organización de máis accións divulgativas sobre o legado de Suárez. Esta previsto un acto en Madrid co Centro Nacional de Fotografía do Ministerio de Cultura. Xa sen a participación da RAGBA, celebraranse multitude de actividades por toda Galicia, como unha exposición da serie “Mariñeiros” no Concello de Bueu durante o verán, comisariada por Xosé Luis Suárez Canal e Manuel Sendón, así como outras accións organizadas pola Universidade da Coruña.
