Cuberta de Trasalba número 2
A revista Trasalba, a publicación oficial da Fundación Ramón Otero Pedrayo, publicou o segundo número da súa revista, dedicado desta volta ao quincuaxésimo aniversario do pasamento de Josefina Bustamante, a parella de Ramón Otero Pedrayo e presenza inseparable do autor ao longo da súa dilatada vida. Deste xeito, recupéranse materiais fotográficos da man de Xosé Antonio López Silva, textos como a homilía das festas das vodas da ouro do matrimonio ou un artigo de Maribel Outeiriño sobre a parella. Entre os artigos académicos deste número, Patricia Arias Chachero percorre a abraiante vida de Manuel Pedrayo Valencia, tío avó de Otero Pedrayo, catedrático de Xeografía e Historia que quedou incapacitado por problemas mentais, ingresado no sanatorio de Conxo, onde impartía conferencias eruditas pensando que estaba cos seus alumnos. Borja Blanco Babarro e Andrea Estévez achéganse ás dedicatorias dos libros remitidos a Ramón Otero Pedrayo e Andrea Mosteiro estuda a relación epistolar de Anisia Miranda e o autor.
