O Centro Cultural Aurelio Aguirre de Conxo, en Santiago de Compostela, acollía este 2 de marzo a presentación de 170 anos do Banquete de Conxo. A Fundación Galiza Sempre e a Agrupación Cultural O Galo editan este caderno que asina Xoán Costa e que "ofrece un rigoroso percorrido polo contexto histórico e a significación política deste importante episodio da nosa historia".
A publicación, que se pode consultar en liña no web da Fundación Galiza Sempre, fai parte da colección Efemérides de Galiza, e nas súas 24 páxinas inclúe reproducións de prensa, fotografías e documentos da época. O texto dá conta tanto da xénese deste encontro entre estudantes e persoas do ámbito obreiro como da súa recepción no momento e da súa pegada posterior na historia do país e do nacionalismo galego.
