Rebeliom no Inframundo sacan peito con 'Orgulho'

Tras os adiantos Sube, Balas ft. Kaze, Bate Fado e Nada, o grupo presenta un traballo que afonda na súa identidade sonora e discursiva, recuperando o seu lugar xa decano, no rap feito en Galicia. Musicalmente, Orgulho mantén a esencia da banda e reforza o seu vínculo coa tradición e a raíz. Desde o inicio do tema Yahla co que abre o disco, están presentes, ademais dunha lembranza da súa propia traxectoria, os sons da tradición, que tamén aparecen salpicando o resto do traballo e para os que contan  con colaboracións coloridas como a de Fillas de Cassandra no tema Contra vento e marea. "Volvemos abrazar os cantos populares, e neste disco latexan con máis forza ca nunca. Hai raíz, hai terra, hai herdanza. Por iso o orgullo non é só un concepto: é o fío condutor de todo o álbum". Confirman desde a comunicación da banda. 

 

 

 

Efectivamente ese orgullo proxéctase na actitude e nas letras, órgullo de raíces, pero tamén orgullo propio, orgullo de clase e de colectivo, de historia, de devanceiras e de ter chegado ata aquí. Trasládase este posicionamento con rabia e paixón ao longo da ducia de temas que conforman este álbum e que pronto terá a súa estrea en directo en Barcelona, o venres 6 de marzo. Bilbao e Madrid (Vallekas) serán as seguintes paradas  e será xa en maio, o día 8, cando a Sala Capitol de Santiago de Compostela poderá acoller a presentación na súa terra, na que será unha noite moi especial na que o 'Orgulho' será compartido coa súa comunidade.