A banda da Loba volta con Lovismo

Co amor nas súas múltiples formas de expresión ("o desexo, as relacións, a maternidade, o amor propio, a sororidade, o amor polo noso...") como eixe, A banda da loba lanzaba este 17 de xaneiro Lovismo, o seu quinto traballo de estudio. Os once temas do álbum chegan da man de Seispés Producións Creativas e foron gravados nos estudios Abrigueiro.

A formación incorporou para este proxecto a Iria de Cabo na guitarra a substituír a Inés Mirás. Canda a ela, continúan no proxecto Andrea Porto (baixo), Estela Rodríguez (violín), Marcela Porto (percusión) e Xiana Lastra (voz). O sinxelo de presentación, Lova, aborda "a transformación a través do amor, da liberación dese fío vermello que nos conecta co resto de persoas, deixando atrás os prexuízos, as normas e as imposicións para amar e amarnos como desexemos".

Non faltan no proxecto adaptacións de textos de poetas galegas, como Rosalía de Castro, a quen o grupo emparella con Bob Dylan en Un pelouro que roda, Olga Novo, de quen incorporan versos en A bachata da gata ou Cruel filosofía e O mar, que musican poemas de Luísa Villalta. Canda a elas, está presente en Amigas a pegada de Irene Solá e o seu libro Canto eu e a montaña baila, nunha reflexión sobre a sororidade.

Un concerto na Sala Capitol de Santiago o vindeiro 1 de febreiro servirá de presentación ao vivo do novo traballo. O recital contará coa presenza de voces convidadas como De Vacas, Tomé Mouriño (De Ninghures) e os músicos Adrián Real, Manu Doel, Lara Porto e Cristóbal Fernández, responsables dos instrumentos de vento do disco.