Triángulo de Amor Bizarro lidera as candidaturas aos III Premios da Música Independente

Álbum do Ano, Canción do Ano, Mellor Artista Español, Mellor Álbum de Rock, Mellor Directo, Mellor Produción Musical, Mellor Videoclip, Mellor Deseño Gráfico e Mellor Fotografía Promocional. A banda galega Triángulo de Amor Bizarro é a que acumula máis candidaturas nos III Premios da Música Independente, que teñen aberto desde hoxe e ata o vindeiro 15 de xuño o prazo de votación a través do seu web. Canda a eles, o grupo Dakidarría opta ao premio ao Mellor álbum de Música Urbana, con Realidades Alienantes, mentres Too many knobs de Colectivo Oruga pode levar o premio ao Mellor álbum de Música Electrónica. No Mellor álbum de Jazz, dúas das cinco candidaturas xorden do noso país. É o caso do Sons-Nús de Maite Dono & Baldo Martínez e mais Zigurat de Abe Rábade.