O compositor e pianista coruñés Teo Montero Rey
A IV edición do Premio Internacional de Composición Portus Apostoli, convocado polo Festival Internacional de Arpa Vila de Noia, xa ten obra gañadora. O xurado outorgou a distinción á creación Alén do azul, do compositor coruñés Teo Montero Rey (A Coruña, 2005) . O galardón, que conleva unha achega económica de 4.000 euros, suporá tamén a estrea absoluta da obra durante a celebración da 13ª edición do Noia Harp Fest, que decorrerá do 29 de xullo ao 1 de agosto, da man da Real Filharmonía de Galicia.
O tribunal, conformado polo compositor Fernando Buide -que exerceu de presidente do xurado-, o director de orquestra Fernando Briones, a arpista da OSG Céline Landelle e a arpista Alba Barreiro -como secretaria sen voto-, decidiu declarar gañadora a obra de Montero Rey "pola súa escritura orquestral, moi sólida e orgánica, con texturas interesantes e contrastes instrumentais". "A parte de arpa é moi variada e utiliza técnicamente moi ben o instrumento. Estruturalmente conta cunha boa narrativa musical, unha cadencia de arpa e un clímax orquestral constrúen un arco dramático final moi coherente", apunta o xurado do Portus Apostoli. Teo Montero Rey é compositor e pianista que estudou no CMUS de Culleredo e no Conservatorio Superior de Música ‘Eduardo Martínez Toner’ do Principado de Asturias.
