Fotografía da exposición 'Espantallos 2012-2025' de Manuel Sendón
A mostra 'Espantallos 2012-2025' que desde hoxe pode verse na Fundación Laxeiro en Vigo é unha evolución das imaxes de espantallos que o fotógrafo Manuel Sendón Expuxera en Ourense en 2014. Agora o autor mostra unha selección de tres daqueles espantallos, aos que foi fotografando de xeito continuado durante os últimos trece anos. Sendón introduce así o factor temporal e, como consecuencia, unha certa narratividade na que mostra en tres secuencias a evolución deses tres personaxes.
O autor comenta que estas historias narradas en imaxes, ben poderían funcionar como metáfora da situación do agro galego, ou tamén como metáfora da actual situación mundial. A partir dun elemento tan cotiá do mundo rural, o autor fálanos de temas como a reciclaxe de materiais, inherente ás culturas rurais europeas, e tamén de como un elemento que se constrúe cunha finalidade práctica implica unha actitude creativa e ate estética.
