A Fundación Laxeiro amosa en Vigo os "eus" do pintor

18 autorretratos de Laxeiro que, ao longo da súa vida, son unha viaxe á evolución artística do pintor de Lalín pódense ver na mostra "Son eu", que se expón ata o 17 de maio na Fundación Laxeiro de Vigo. Diseminadas polo medio da colección permanente da Fundación, a mostra permite descubrir os dezaoito autorretratos nos que Laxeiro se acreditaba coas palabras que dan título a esta mostra comisariada por Carlos Bernárdez. Cinco das pezas pertencen á colección da propia Fundación, ás que se suman outras nunca antes expostas ou que pertencen a coleccións privadas de fóra de Galicia. Os retratos son unha auténtica mostra da evolución artística de Laxeiro.