A exposición 'Internalities. Arquitecturas para un equilibrio territorial' inicia a programación do 2026 no Centro Galego de Arte Contemporánea en Santiago de Compostela e chega a Galicia tras representar a España na 19ª edición Bienal de Arquitectura de Venecia 2025. Os comisarios da exposición son os arquitectos galegos Manuel Bouzas e Roi Salgueiro. A montaxe poderá visitarse ata o 3 de maio.
O museo da Xunta inicia a programación anual con este proxecto impulsado polo Goberno do Estado en colaboración con Acción Cultural Española. Trátase dunha mostra que pon en valor o emprego de recursos locais, rexenerativos e de baixa pegada de carbono dunha nova xeración de estudos de arquitectura españois. 'Internalities. Arquitecturas para un equilibrio territorial', divídese en dúas áreas. A primeira delas, titulada Balance, inclúe 16 obras construídas de arquitectura, paisaxismo e espazo público. O segundo espazo desenvolve investigacións sobre cinco eixos fundamentais para reducir as emisións do sector da construción: materiais, oficios, enerxías, residuos e emisións. Cada un destes eidos explórase en relación con cinco xeografías diferentes da península ibérica e está coordinado por un equipo de arquitectos-investigadores especializados neses temas e áreas xeográficas.
